മകള്‍ നന്ദനയുടെ പിറന്നാള്‍ ദിനത്തില്‍ ഹൃദയം നുറുങ്ങുന്ന വാക്കുകളുമായി കേരളത്തിന്റെ സ്വന്തം വാനമ്പാടി. ഫേസ്ബുക്കിലൂടെയാണ് ചിത്ര മകള്‍ നന്ദനയുടെ പിറന്നാള്‍ ദിനത്തില്‍ കുറിപ്പ് പങ്കുവെച്ചത്. ഒരു ദിവസം ഭൂമിയില്‍ നിന്നും വേര്‍പെട്ട് മകള്‍ക്കരികില്‍ എത്തുമെന്നും അവിടെ വച്ച് മൂന്നുപേരും ഒരുമിച്ച് ചേരുമെന്നും ചിത്ര കുറിച്ചു.
കാലത്തിന് മുറിവുണക്കാനാകില്ല. ഇത് ദൈവത്തിന്റെ തീരുമാനവുമായിരുന്നില്ല. ആ വേര്‍പാട് യഥാര്‍ഥത്തില്‍ ഞങ്ങളില്‍ എത്രത്തോളം നഷ്ടങ്ങളും വേദനയും ഉണ്ടാക്കുന്നുവെന്ന് ദൈവത്തിന് അറിയാമായിരുന്നെങ്കില്‍ ഞങ്ങളുടെ പ്രിയ നന്ദന മോള്‍ ഇപ്പോഴും ഇവിടെ ഉണ്ടാകുമായിരുന്നുവെന്നും ചിത്ര കുറിക്കുന്നു.
വര്‍ഷങ്ങള്‍ നീണ്ട കാത്തിരിപ്പിനൊടുവില്‍ 2002ലാണ് ചിത്രയ്ക്കും ഭര്‍ത്താവ് വിജയശങ്കറിനും മകള്‍ പിറന്നത്. എന്നാല്‍ 2011 ഏപ്രില്‍ 11ന് ദുബായിയിലെ വില്ലയില്‍ നീന്തല്‍കുളത്തില്‍ വീണ് നന്ദന മരണപ്പെടുകയായിരുന്നു.
കുറിപ്പ് ഇങ്ങനെ;
‘കാലത്തിന് മുറിവുണക്കാനാകില്ല. ഇത് ദൈവത്തിന്റെ തീരുമാനവുമായിരുന്നില്ല. ആ വേര്‍പാട് യഥാര്‍ഥത്തില്‍ ഞങ്ങളില്‍ എത്രത്തോളം നഷ്ടങ്ങളും വേദനയും ഉണ്ടാക്കുന്നുവെന്ന് ദൈവത്തിന് അറിയാമായിരുന്നെങ്കില്‍ ഞങ്ങളുടെ പ്രിയ നന്ദന മോള്‍ ഇപ്പോഴും ഇവിടെ ഉണ്ടാകുമായിരുന്നു. കാലങ്ങള്‍ എത്ര കടന്ന് പോയാലും ഈ ദു:ഖം ഞങ്ങള്‍ പേറുന്നു. അത് എക്കാലത്തും ഞങ്ങളുടെ നൊമ്പരമാണ്. ആ വേദനയില്‍ കൂടി ഞങ്ങള്‍ കടന്നു പോകുന്നു. ഞങ്ങളെ രണ്ടു പേരെയും ദൈവം അങ്ങോട്ടു വിളിച്ചുകഴിയുമ്പോള്‍ ഞങ്ങള്‍ മൂന്നു പേരും വീണ്ടും ഒരുമിച്ചു ചേരും. എന്റെ പൊന്നുമോള്‍ നന്ദനയ്ക്ക് ഒത്തിരി പിറന്നാള്‍ ആശംസകള്‍’
Discussion about this post