ചെന്നൈ: മുന്‍ ഇന്ത്യന്‍ ക്രിക്കറ്റ് ടീം ക്യാപ്റ്റന്‍ എം എസ് ധോണിയോടുളള ആരാധന മൂത്ത് വീടിന് മുഴുവന് മഞ്ഞ പെയിന്റടിച്ച് ആരാധകന്‍. തമിഴ്‌നാട്ടിലാണ് സംഭവം. കടലൂര്‍ ജില്ലയിലെ അരങ്ങൂരില്‍ താമസിക്കുന്ന ഗോപികൃഷ്ണനാണ് ധോണിയോടുള്ള ആരാധന മൂത്ത് വീട് മുഴുവന് മഞ്ഞ നിറം പെയിന്റടിച്ചത്.
ഇതിലും നില്ക്കുന്നില്ല ടീമിനോടും ധോണിയോടുമുളള ആരാധന. ചെന്നൈ സൂപ്പര്‍ കിംഗ്‌സിന്റെ ലോഗോ ആയ ദി ലയണും വീടിന്റെ പുറം ചുവരില്‍ ഇടംപിടിച്ചു. ധോണിയുടെ ചിത്രമാണ് മറ്റൊരു ആകര്‍ഷണം. ധോണിയുടെ ആരാധന കൂടുതല്‍ പ്രകടമാക്കാന്‍ വീടിന്റെ പ്രവേശനകവാടത്തില്‍ ഹോം ഓഫ് ധോണി ഫാന്‍ എന്നും വലിയ അക്ഷരത്തില് എഴുതി വച്ചിട്ടുണ്ട്.
ഗോപികൃഷ്ണനോട് നന്ദിസൂചകമായി ചെന്നൈ സൂപ്പര്‍ കിംഗ്‌സാണ് ട്വിറ്ററിലൂടെ ചിത്രങ്ങള്‍ പുറത്തുവിട്ടത്. കോവിഡിനെ തുടര്‍ന്ന് മിഡില്‍ ഈസ്റ്റിലെ ജോലി ഉപേക്ഷിച്ചാണ് ഗോപികൃഷ്ണന്‍ നാട്ടില്‍ തിരിച്ചെത്തിയത്. ചെന്നൈ സൂപ്പര്‍ കിംഗ്‌സിന്റെ മഞ്ഞ നിറം പെയിന്റ് ചെയ്യുന്നതിന് ഒന്നരലക്ഷം രൂപയാണ് ചെലവഴിച്ചത്.
ഈ സീസണില്‍ ചെന്നൈ സൂപ്പര്‍ കിംഗ്‌സിന്റെ പ്രകടനം പ്രതീക്ഷിച്ച നിലവാരത്തില്‍ എത്തിയിട്ടില്ല. എട്ടു കളികളില്‍ മൂന്നെണ്ണത്തില്‍ മാത്രമാണ് ജയിക്കാന്‍ ആയത്. അതിനിടെയാണ് ടീമിലും ധോണിയിലും ഉളള വിശ്വാസം നിലനിര്‍ത്തി ആരാധകന്റെ പ്രവൃത്തി.
Discussion about this post