അര്‍ബുദം ബാധിച്ച് ദീര്‍ഘനാളായി ചികിത്സയിലായിരുന്ന നടി ശരണ്യ ശശി വീണ്ടും ജീവിതത്തിലേയ്ക്ക്. ഏഴ് ശസ്ത്രക്രിയകളും കാന്‍സര്‍ ചികിത്സ ഏല്‍പ്പിച്ച വേദനകളും മനഃശക്തി കൊണ്ട് അതിജീവിച്ചാണ് ശരണ്യ മരണത്തെ പോലും തോല്‍പ്പിച്ച് ജീവിതത്തിലേയ്ക്ക് നടന്നു കയറിയത്.
എട്ട് വര്‍ഷത്തെ ഇടവേളയില്‍ എട്ട് ശസ്ത്രക്രിയ, കാന്‍സറിനോട് പൊരുതി തളര്‍ന്നു പോയ ശരീരം, മരുന്നും ഫിസിയോതെറാപ്പിയുമായി ദീര്‍ഘകാലത്തെ ആശുപത്രി വാസം. ഇവയെല്ലാം മറികടന്നാണ് ശരണ്യയുടെ തിരിച്ചുവരവ്. അസുഖമെല്ലാം മാറിയല്ലോ ഇനി എന്തൊക്കെയാണ് ഭാവി പരിപാടികള്‍ എന്ന് ചോദിച്ചപ്പോള്‍ മറുപടി ഇങ്ങനെ. തിരിച്ചുപിടിക്കാനൊന്നും ആഗ്രഹിക്കുന്നില്ല, ഇനിയും നല്ല വേഷങ്ങള്‍ കിട്ടിയാല്‍ ചെയ്യും- ശരണ്യ പറയുന്നു.
വര്‍ഷങ്ങള്‍ നീണ്ട ചികിത്സയില്‍ ഒരു ഘട്ടമെത്തിയപ്പോള്‍ ശരണ്യയും കുടുംബവും കടുത്ത സാമ്പത്തിക പ്രതിസന്ധിയിലായി. അന്ന് ആ കുടുംബത്തിന് താങ്ങായി കൂടെയെത്തിയതാണ് നടി സീമ ജി നായരായിരുന്നു. അന്ന് മുതല്‍ ശരണ്യയ്‌ക്കൊപ്പമുണ്ട് സീമ. സമൂഹ മാധ്യമങ്ങളിലൂടെ ശരണ്യയുടെ അസുഖ വിവരം അറിഞ്ഞ നിരവധിപ്പേര്‍ സഹായവുമായി എത്തി. എല്ലാവരോടും നന്ദി പറയുന്നുവെന്നും ശരണ്യ കൂട്ടിച്ചേര്‍ത്തു. തിരിച്ച് വീട്ടിലേക്ക് പോകണം. തിരുവനന്തപുരത്ത് പണിത പുതിയ വീടിനറെ പാല് കാച്ചല്‍ നടത്തണം. ശേഷം സ്‌ക്രീനില്‍ കാണാം എന്ന് പറഞ്ഞാണ് ശരണ്യ മടങ്ങിയത്.
Discussion about this post